"ევერტონის" კაპიტანმა და ცენტრალურმა მცველმა, ფილ იაგელკამ ახალი კონტრაქტი გააფორმა საკუთარ კლუბთან.

ლივერპულული კლუბის ოფიციალური ვებ-გვერდი იტყობინება, რომ ინგლისელმა მოთამაშემ მოქმედი ხელშეკრულება ერთი წლით გაახანგრძლივა და 2018 წლის ზაფხულამდე დარჩება გუდისონ პარკზე.

"მოლაპარაკებები არც ისე დიდი ხანი გაგრძელდა - რამდენიმე წუთი და არა საათი. მიყვარს ეს ადგილი და დარჩენა მინდოდა, მიხარია, რომ კლუბსაც იგივე აზრი აქვს. კონტრაქტის კიდევ ერთი დამატებითი წელი, მოტივაციას ამიმაღლებს", - განაცხადა იაგელკამ.

32 წლის ფილ იაგელკა 2007 წელს გადავიდა "ევერტონში" და მაქედან მოყოლებული, 300-ზე მეტი ოფიციალური მატჩი ჩაატარა ლურჯი მაისურით.