FCI.ge

Barcelon
Real Madrid
Atletico Madrid
Valencia
Manchester United
Chelsea
Liverpool
Manchester City
Arsenal
Juventus
Milan
Roma
Napoli
Napoli
Bayern Munchen
Borussia Dortmund
Schalke 04
Bayer Leverkusen
PSG
Olympique Lyonnais
Olympique Marseille
Ajax
PSV
Porto
Dinamo Tbilisi
Dila
Chikhura
Zestafoni
Metalurgi Rustavi
Guria

გამოკითხვა

FCI.ge

პრევიუ: ბარსელონა Vs რეალი

2-04-2016
15 კომენტარი

2016 წლის პირველი სანაკრებო პაუზა უკან მოვიტოვეთ და იწყება მიმდინარე საკლუბო სეზონის დასკვნითი ნაწილი. ესპანეთის ლა ლიგა სუპერ უქმეებით ბრუნდება და დღეს ელ კლასიკო გველოდება, რომელმაც შესაძლოა 99%–თ გაარკვიოს საბოლოოდ ტიტულის ბედი. თუმცა, კამპ ნოუზე, ორივე უნიკალური გუნდი არამხოლოდ სატურნირო მიზნით ეცდება გამარჯვების მოპოვებას, ეს ელ კლასიკოა, სადაც მოგება – უბრალოდ აუცილებელია!

 

ბარსელონა Vs რეალი

 

ჩემპიონატი: ესპანეთის ლა ლიგა, XXXI ტური

თარიღი: 22:30 საათი, 2 აპრილი

სტადიონი: კამპ ნოუ, ბარსელონა

მთავარი მსაჯი: ალეხანდრო ერნანდესი ერნანდესი

პირდაპირი ტრანსლიაცია: Silk სპორტ HD1

 

კატალონიურმა გრანდმა სანაკრებო პაუზის წინ დაკარგა ქულები ეროვნულ ჩემპიონატში, მაგრამ კვლავ ლა ლიგის მოგების უმთავრესი ფავორიტია. "ბლაუგრანა" ათი ქულით უსწრებს მადრიდის "რეალს", რაც სოლიდური სხვაობაა. "ვილიარეალთან" შეხვედრაში "ბარსამ" ნამდვილად ვერ აჩვენა საუკეთესო ფეხბურთი და პირველ ტაიმში მოპოვებული ორბურთიანი უპირატესობა არამცთუ გაანიავა, არამედ ძლივს შეინარჩუნა ბოლოსკენ. თუმცა, იყო ერთი პოზიტიური დეტალი – პენალტების გამოყენების სახით, რომელიც ნეიმარმა შეასრულა. თუმცა, ამ შეხვედრამდე "ბარსელონამ" ლონდონის "არსენალი" დაამარცხა შინ 3:1 და გავიდა ჩემპიონთა ლიგის მეოთხედფინალში, სადაც სერიოზული მეტოქე ჰყავს "ატლეტიკოს" სახით. აღსანიშნავია, რომ ლუის ენრიკეს გუნდს მიმდინარე სეზონში უკვე ხშირად ჩაუვარდა შეხვედრის ერთ–ერთი ტაიმი. მაგალითად, ბოლო ორ მატჩში, "არსენალთან" კატალონიელებმა პირველი ნახევარი ჩაატარეს ცუდად, "ვილიარეალთან" კი – მეორე და ასეთი შემთხვევა მანამდეც მომხდარა. თუმცა, ესპანური გრანდის უნიკალური დაუმარცხებელი სერია გრძელდება და უკვე 39 მატჩს შეადგენს. მსოფლიოში საუკეთესო შემტევი ტრიო სრულ მზადყოფნაშია, ცენტრშიც ყველაფერი კარგად არის, მაგრამ პრობლემებია დაცვაში. "ბარსელონას" სუსტი წერტილი სწორედ ეს რგოლია, მაგრამ ჯერჯერობით ენრიკე და მისი გუნდი უმკლავდებიან ამ ხარვეზს. სანაკრებო თამაშების დროს კი სერიოზულად დაიმტვრა გამოცდილი, თანაც უნივერსალური ფრანგი ჟერემი მატიე, რომელიც მინიმუმ თვე–ნახევარს გამოტოვებს. პლიუს ამას ტრავმირებულია ბრაზილიელი ადრიანო და სანდრი რამირესი. საეჭვოა ხორდი ალბას თამაში და თუ სწრაფი ესპანელი არ იქნება მზად, მაშინ ენრიკეს სერიოზული თავსატეხი გაუჩნდება, რადგან მისი ნომინალური შემცვლელები დამტვრეული ჰყავს ადრიანოსა და მატიეს სახით, მაგრამ არის ტომას ვერმალენის ალტერნატივა. მიუხედავად იმისა, რომ სერხი რობერტოს საოცარი სეზონი აქვს და რუმინეთთან ესპანეთის ნაკრებშიც ჩაატარა პირველი მატჩი, ცენტრში საუკეთესო მოთამაშეები იმოქმედებენ. პირველი წრის კლასიკო სერხიმ ითამაშა ფორვარდის პოზიციაზე მესის არყოფნაში და იყო ფანტასტიკური, მაგრამ არგენტინელი ახლა მწყობრშია. "ბარსელონა" დიდებულად ასპარეზობს 2016 წელს და ელ კლასიკო მორიგი შანსია იმისა, რომ ამ გუნდმა დაამტკიცოს თავისი სიძლიერე. გამარჯების შემთხვევაში "ბლაუგრანა" ფაქტიურად გაიფორმებს ჩემპიონობას, მაგრამ თუნდაც წაგების შემდეგ ლუის ენრიკეს გუნდი იქნება მთავარი ფავორიტი. შესაბამისად, თამამად შეიძლება იმის თქმა, რომ "ბარსას" გაცილებით მნიშვნელოვანი დაპირისპირება ელოდება რამდენიმე დღეში ჩემპიონთა ლიგაზე, მაგრამ ეს ელ კლასიკოა – განსაკუთრებული თამაში, რომლის მოგებაც ორმაგად ფასობს და ქომაგებისთვის ჰაერივით მნიშვნელოვანია.

 

დიდებულ განწყობაზე იმყოფება "სამეფო კლუბი", რომელიც სანაკრებო პაუზას ზედიზედ ხუთი გამარჯვებით შეხვდა. ჩემპიონთა ლიგის მერვედფინალურ ეტაპზე გამოჩნდა, რომ "რეალს" საკმაოდ ბევრი პრობლემა აქვს. მიუხედავად იმისა, რომ ესპანელებმა ორი მატჩის ჯამში 4:0 მოუგეს "რომას", ვერცერთ შეხვედრაში ვერ აჯობეს მეტოქეს, მაგრამ ასეთ დროს მოგებებიც გამარჯვებულთა ხვედრია. ეროვნულ ჩემპიონატში "რეალმა" ბოლო ორი გამარჯვება რთული თამაშის ფონზე მოიპოვა, მაგრამ ბოლოს მოუგო "სევილიას" შინ 4:0. ძალიან კარგად დაბრუნდნენ კარიმ ბენზემა და გარეთ ბეილი, რაც ძალიან სასიხარულოა მადრიდისტებისათვის. უელსელი უკვე ფორმაშია, ბენზემამ კი ისევ გამოტოვა სანაკრებო თამაშები, მაგრამ მაინც კარგ კონდინციებში ხვდება ელ კლასიკოს. ზინედინ ზიდანმა მოახერხა და "რეალის" სათამაშო ფილოსოფია გახადა ზუსტად ისეთი, როგორიც სურთ ქომაგებს. "სამეფო კლუბი" მხოლოდ შეტევაზე ფიქრობს, მაგრამ დასახვეწია ტაქტიკური მოქმედებები. მაგალითად, საჭიროა უფრო მეტი ბალანსი მოედნის ცენტრში და აგრეთვე დაცვასა და შეტევას შორის. დაცვის ხაზი საკმაოდ არეულია, მაგრამ ზიდანი სულ რაღაც რამდენიმე თვეა რაც მუშაობს "რეალში" და საერთოდ მთავარი მწვრთნელის პოსტზე, ამიტომ რა თქმა უნდა, სჭირდება გარკვეული დრო. ჯერჯერობით მადრიდულ გრანდს შედეგი აქვს და ერთი დერბის წაგების გამო არ შეიძლება ფრანგი სპეციალისტისთვის ხაზის გადასმა. თუნდაც ეს მატჩიც რომ წააგოს "ბლანკოსმა" ზიდანზე აუგს ვერავინ იტყვის, მაგრამ გამარჯვების შემთხვევაში უდიდესი თავდაჯერებულობა შეემატება ზიზუს თავის გუნდთან ერთად. საბედნიეროდ, მადრიდულ გრანდს ორივე ცენტრალური მცველი: პეპე და სერხიო რამოსი დაუბრუნდნენ, რომელთაც ბოლო მატჩი დისკვალიფიკაციის გამო გამოტოვეს. ზიდანს ყველა ფეხბურთელი მწყობრში ჰყავს გარდა ბორხა მაიორალისა, რომელიც ალბათ ისედაც ვერ მოხვდებოდა განაცხადში. საინტერესოა კვლავ მარჯვენა მცველის პოზიცია და ცენტრში ტრიოს დაკომპლექტების ამბავი. სავარაუდოდ, ზიდანი მარჯვენა ფრთაზე დანიელ კარვახალს გაამწესებს, რომელმაც ამ სეზონში უკვე არაერთხელ დაჯაბნა ბრაზილიელი კონკურენტი დანილო. ცენტრში კი ალბათ აუცილებელია კასერიმო, რომელიც სწორედ ზემოთხსენებულ ბალანსს ქმნის. ფიზიკურად ძლიერი ბრაზილიელი ძალიან კარგია შავი სამუშაოს შესრულებაში და მისი ტიპის მოთამაშე "რეალს" ნამდვილად არ ჰყავს. ტონი კროოსი და ლუკა მოდრიჩი კი ბუთის ფლობაზე და შეტევების ორგანიზებაზე იფიქრებენ. ჯეიმს როდრიგესის სიტუაცია ძალიან რთულია, რადგან კოლუმებიელის ადგილი ფაქტიურად ვერ მოიძებნა ზიდანის სტრატეგიაში, მაგრამ ვნახოთ, დრო ჯერ კიდევ არის. დღევანდელი მატჩი უაღრესად მნიშვნელოვანია "რეალისათვის". საქმე მხოლოდ სატურნირო ცხრილს არ ეხება, საქმე მორალურ მდგომარეობაშია. თუ "სამეფო კლუბი" წააგებს ელ კლასიკოსაც დერბის შემდეგ, ეს საკმაოდ დიდი დარტყმა იქნება არამხოლოდ ზიდანისთვის, არამედ მთელი კლუბისათვის. შესაბამისად, "რეალი" არანორმალურად მოტივირებული იქნება და ეცდება, რომ აიღოს აუცილებელი რევანში.

 

კამპ ნოუზე სუპერ დაპირისპირება გველოდება, რომელიც ყოველთვის ყურადღების ცენტრშია. "ბარსელონა" და "რეალი" ეცდებიან გაამართლონ ქომაგების იმედები და მორიგი სპექტაკლი შემოგვთავაზონ, რადგან ელ კლასიკოზე ყოველთვის ბევრს საუბრობენ.

 

 

სავარაუდო შემადგენლობები:

ბარსელონა: ბრავო – დანი ალვეში, მასკერანო, პიკე, ალბა – ინიესტა, ბუსკეცი, რაკიტიჩი – მესი, სუარესი, ნეიმარი.

 

რეალი: ნავასი – კარვახალი, პეპე, რამოსი, მარსელო – კროოსი, კასემირო, მოდრიჩი – ბეილი, ბენზემა, რონალდო.

 

 

საინტერესო ფაქტები:

  • ლუის ენრიკეს გუნდს ზედიზედ შვიდი საშინაო თამაში აქვს მოგებული ლა ლიგაში, ბურთების არანორმალური შეფარდებით – 30:3!
  • "რეალმა" კი ზიდანის მოსვლის შემდეგ ხუთი გასვლითი თამაშიდან სამი მოიგო და ხუთივეში გაუშვა გოლი.
  • ეს 172–ე ელ კლასიკო იქნება ესპანეთის ჩემპიონატის ისტორიაში. უპირატესობა მადრიდულ გრანდს აქვს – 71 მოგება, "ბარსელონას" კი – 68 მოგება.
  • ბოლო 15 ელ კლასიკოს სტატისტიკა ყველა ტურნირის ეგიდით იდეალურად არის დაბალანსებული: 6 მოგება "ბარსას", 6 მოგება "რეალს" და სამი ფრე.
  • ელ კლასიკოში უგოლო ფრე 2002 წლის შემდეგ არ დაფიქსირებულა.
  • ბოლო 18 ელ კლასიკოდან მხოლოდ ერთ შეხვედრაში გავიდა ორზე ნაკლები ბურთი და ის ფრედ 1:1 დასრულდა.
  • ესპანეთის ლა ლიგაში გამართული ბოლო ხუთი ელ კლასიკოდან ოთხი მოიგო "ბარსამ" და მხოლოდ ერთი "რეალმა".
  • "სამეფო კლუბს" ესპანეთის ჩემპიონატში 2012 წლის შემდეგ არ მოუგია კამპ ნოუზე (1ფ და 2წ).
  • ელ კლასიკოების ყველა დროის საუკეთესო ბომბარდირს, ლიონელ მესის, ამ დაპირისპირებაში 2014 წლის 24 მარტის შემდეგ არ გაუტანია გოლი ანუ ოთხი თამაშის განმავლობაში.
  • ბოლოს, როდესაც არგენტინელმა კლასიკოში გამოიჩინა თავი, "ბარსამ" სანტიაგო ბერნაბეუზე 4:3 იმარჯვა და ლეომ ჰეთ–რიქი გაიფორმა.
  • კრიშტიანო რონალდოს ელ კლასიკოებშ სულ 15 გოლი აქვს გატანილი და ამ მაჩვენებლით იყოფს მესამე ადგილს რაულ გონსალეს ბლანკოსთან ერთად. ასე, რომ პორტუგალიელს "რეალის" ლეგენდის გადასწრება შეუძლია.
  • ლუის ენრიკე იმ იშვიათ ფეხბურთელებს შორისაა, რომელსაც ელ კლასიკო ორივე გუნდის მაისურით აქვს ნათამაშები. ის ჯერ "რეალის" ღირსებას იცავდა (1991–96), შემდეგ კი "ბარსელონას" (1996–2004).
  • 2001–04 წლების პერიოდში, ზინედინ ზიდანი და ლუის ენრიკე ერთმანეთს ექვსჯერ დაუპირისპირდებიან კლასიკოებში, საიდანაც ოთხი დასრულდა ფრედ, ერთი მოიგო ზიდანის "რეალმა" და ერთიც ენრიკეს "ბარსამ". თუმცა, კონკრეტულად ლა ლიგაში, სამი დასრულდა ფრედ და ერთი მოიგო ლუის ენრიკემ.

 

წინასამატჩო კომენტარები:

 

კეილორ ნავასი: "ვფიქრობთ, რომ ეს გამარჯვების მოპოვების კარგი შესაძლებლობაა. სატურნირო მდგომარეობის გათვალისწინებით, ამ მატჩის მოგება შეგვმატებს თავდაჯერებულობას და დაგვაახლოვებს მიზანთან.

 

ვიცით, რომ ლა ლიგა რთული ჩემპიონატია, მაგრამ იმისათვის, რომ დარჩე ბრძოლაში, არ უნდა დაუშვა ცხვირი. უნდა გავაგრძელოთ ბრძოლა ამ უნიკალური კლუბის გამო!.

 

ერთადერთი რამ, რაზეც ვოცნებობდი იყო თამაში. ჯერჯერობით ყველაფერი კარგადაა, ვუმატებ და ვუმატებ. აქ იმისათვის მოვედი, რომ ბერნაბეუზე დიდი ხანი დავრჩე და ამ მიმართულებით ვმუშაობ".

 

სერხიო რამოსი: "შაბათს ისეთ მშვენიერ გუნდს ვეთამაშებით სტუმრად, როგორიც "ბარსელონაა". პირველი წრის ცუდი მატჩის შემდეგ, ფეხბურთი რევანშის შანსს გვაძლევს.

 

"რეალს" სურს, რომ ჩაატაროს კარგი მატჩი და მხოლოდ ამ მიზნით ჩადის კამპ ნოუზე. გვინდა, რომ მოვიპოვოთ სამი ქულა და შევამციროთ ჩამორჩენა ცხრილში "ბლაუგრანასთან"".

 

კასემირო: "გვესმის, რომ ეს კვირა განსაკუთრებულია მოთამაშეებისათვის, ქომაგებისთვის და მთელი კლუბისთვის. ელ კლასიკო არის მატჩი, რომელშიც მონაწილეობა ყველას უნდა. იმედი მაქვს, "რეალი" მოახერხებს გამარჯვების მოპოვებას. მინდორზე ყველაფერს დავდებთ.

 

ყოველი დღისა და ყოველი თამაშის შემდეგ, სულ უფრო სტაბილურად და დამაჯერებლად ვგრძნობ თავს მადრიდში. მწვრთნელებმა და გულშემატკივრებმა იციან, რომ აქ გუნდის დასახმარებლად ვარ",

 

ალეშ ვიდალი: "გვინდა, რომ ეს დღე კრუიფს ვაჩუქოთ. ასეთ მატჩებში იმდენი დამატებითი მოტივაციაა, რომ დანარჩენი ყველაფერი გვერდით უკან გადადის. "ბარსელონას" მსოფლიოში საუკეთესო მოთამაშეები ჰყავს და თავისუფლად შეუძლია ზედიზედ რამდენიმე მატჩის ჩატარება, თანაც ფანტასტიკურ დონეზე.

 

მსოფლიოში უძლიერესი ფორვარდი გვყავს. გვინდა, რომ მუდამ ვიმარჯვებდეთ".

 

ანდრეს ინიესტა: "გამარჯვება ელ კლასიკოში "რეალის" წინააღმდეგ კარგი მისავალი იქნება კრუიფის სულისთვის. იმედი მაქვს, მოვიგებთ მის გამო. რა თქმა უნდა, ეს დამატებითი მოტივაციაა ჩვენთვის.

 

ნამდვილად არ გამოვყოფთ მატჩებს "რეალის" წინააღმდეგ დანარჩენებისგან. ისე, როგორც დანარჩენები – ის ფინალის ტოლფასია ჩვენთვის.

 

მადრიდელების სახით ყოველთვის ძლიერ მოწინააღმდეგეს ვხედავ. უნდა გავაკეთოთ ის, რასაც მიჩვეულნი ვართ და ვითამაშოთ ჩემი ფეხბურთი. იმედი მაქვს, ეს დაპირისპირება დიდი საფეხბურთო ზეიმი იქნება.

 

არ ვფიქრობთ ბერნაბეუზე მოპოვებულ გამარჯვებაზე პირველ წრეში და არც ლიდერობაზე ჩემპიონატში. გუნდი კიდევ უფრო ახლოს იქნება ტიტულთან გამარჯვების შემთხვევაში, მაგრამ პატივს ვცემთ "რეალს". ელ კლასიკო – ყოველთვის განსაკუთრებული მატჩია".

 

ზინედინ ზიდანი: "მოთამაშეებს მშვენივრად ახსოვთ თუ რა მოხდა პირველი წრის მატჩში. შურისძიება? არა. ეს არის თამაში, რომლის მოგებაც გვინდა უბრალოდ.

 

ბოლო პერიოდში კარგ ფორმაში ვიმყოფებით და ვაგრძელებთ სამუშაოს. მინდა, რომ ჩემმა გუნდმა ელ კლასიკოში ისე ითამაშოს, როგორც ბოლო პერიოდში.

 

ვეცდები, რომ მივიღო მაქსიმალური სიამოვნება, რადგან ეს ჩემი პირველი კლასიკოა "რეალის" მთავარი მწვრთნელის რანგში".

 

ლუის ენრიკე: ""ბარსელონა" არ აპირებს სათამაშო სტილის შეცვლას. რაც შეიძება დიდი ხანი უნდა ვფლობდეთ ბურთს, რათა "რეალმა" თავისი ძლიერი მხარეები ვერ გამოავლინოს. ჩვენი მიზანია, რომ დავრჩეთ ლიდერები ცხრილში და გადავდგათ დიდი ნაბიჯი ჩემპიონობისკენ.

 

ჩვენი გამარჯვება ელ კლასიკოში ალბათ ბოლო დარტყმა იქნება "რეალისთვის" და "ატლეტიკოსთვის", მაგრამ ჯერ უნდა მოვიგოთ".

 

 

ესპანეთის ლა ლიგის საუკეთესო ბომბარდირები

ფეხბურთელი გუნდი გოლი პენალტით
1 კრიშტიანო რონალდო რეალი 28 6
2 ლუის სუარესი ბარსელონა 26 1
3 ლიონელ მესი ბარსელონა 22 3
4 ნეიმარი ბარსელონა 21 4
5 კარიმ ბენზემა რეალი 20 0

https://fci.ge/uploads/posts/2016-04/1459542045_barcelonareal-madridcopadelrey.jpg
მწვანე ზონა

ინფორმაცია

სიახლისთვის კომენტარის დატოვება შესაძლებელია მხოლიდ მიმდინარე 3 დღე გამოქვეყნების დღიდან.

navige
saitebi